Med plank og strengar

Meir lyd?

2012-01-24T13:14:00.000-08:00

Sidan eg er so effektiv i dag, so kjem det eit lite klipp til. Naturell-lyd frå gitaren på biletet.

Lyd?

2012-01-24T10:03:00.001-08:00

Fort og gale berre for å teste, og gi eksempel på, lyden i piezomicen. Ei lita oppgradering i innspelingsutstyr sidan sist eg heldt på med slikt, so no kan eg ikkje lenger skulde alle ulydane på utstyret. Det er uansett lyd, og med tanke på at mic-oppsettet kostar rundt femtilappen, so er ikkje det so ille.

Nedlastingslink

Den andre halvparten av 2011

2012-01-19T23:21:00.000-08:00

Nokon bilde og nokon ord om den andre som blei ferdig i 2011. Litt meir effektiv med denne. Var "berre" to månader frå eg begynte og til eg blei ferdig... Imponerande...

Dei par tinga som er verdt å merke seg med denne, er forsøket på litt utskjering på hovudet, samt at den har fått eit gripebrett i rosetre. Gripebrettet kom som eit resultat av at Vegards sløvsinn rota til byggeprosessen litt, og det måtte gjerast eit forsøk på å rydde opp igjen i det på enklaste vis. Å få gripebrettet til å passe var forøvrig mindre arbeid enn frykta, so det skal etterkvart gjerast forsøk på å lage ein litt meir skikkeleg hals med band og det heile. Hurra!

Lyden i denne er heilt ok den og, og her også so skal eg sjå om eg får somla meg til å spele inn litt før eg leverar den frå meg.

Denne skal forøvrig til eit menneske som er utøvande musikar, so med litt flaks får eg høyre meir frå den seinare.

Tilbake frå dei døde?

2012-01-19T23:05:00.000-08:00

Ikkje at det har teke lang tid eller noko, men no er det omsider liv i bloggen igjen. Jeij! 2011 kan kven som helst få billig av meg, men det blei til slutt gjort litegrann det året også.

Denne cbg-en blei påbegynt å januar, blei gjort bittelitt med i Mai, for so å bli ferdig i Oktober. So effektivt at ein skulle tru eg var statlig ansatt, noko eg i og for seg er også då, so eg har noko å skulde på.

Med tanke på at eg ikkje hugste frå den eine arbeidsdagen til den neste, som då gjerne var fleire månader seinare, kva eg holdt på med, so er eg faktisk nøgd med det ferdige resultatet. Som alltid so er det mykje småplukk som kunne og burde vore gjort bedre, men alt i alt eit ok resultat. Litt kul lyd er det i den også. Satsar på å få klimpra inn nokon tonar og lagt ut før eg leverar den frå meg.

So mykje meir er det egentlig ikkje å seie no, men det kjem minst ei oppdatering til i dag so lenge so eg har ein ferdiggjort sak til ståande, og so håpar eg på at det blir litt hyppigare oppdateringar i år enn i fjor.

Litt video for å starte det nye året

2011-01-04T14:07:00.000-08:00

Kompis av meg har surra seg til å spele inn og legge ut ein liten videosnutt av seg sjølv som spelar på ein av mine bygg, so det må jo nesten delast med folket. Gledar meg litt til å høyre meir lyd frå den kanten etterkvart som karen blir bedre kjent med gitaren.

Enjoy!

Dukka opp ein video til gitt, so her er den :

Eit lite tilbakeblikk

2010-12-29T02:32:00.000-08:00

2010 er snart forbi, og det er dags for eit kjapt tilbakeblikk på kva som har blitt gjort i løpet av året. Byggeprosjekta vart i alle høve mange fleire og langt finare enn kva eg såg for meg at det skulle bli når den første blei sett i hop av ein sigarboks og ein planke på seinhausten 2009.

At andre syns dette prosjektet var litt gøy og hadde lyst på tilsvarande instrument var artig, og når eg har tida til å gjere noko med det, so er det kjempegreier å ha moglegheit til å prøve å bli flinkare og stadig få til bedre instrument.

Nokon mindre vellukka prosjekt har det jo blitt, men so lenge ein lærer noko av det og veit kva feil ein helst ikkje bør gjenta til seinare, so gjer jo ikkje det noko. Og so lenge det var eit menneske som hadde lyst på denne som veggpryd, so er jo alt velstand.

Det var og stor stas med den første som blei levert frå meg. Litt rart å sende frå seg eit instrument eg sjølv har bygd. Til å begynne med so var det jo nesten ille å sende frå seg instrumenta. Blei jo knytta til dei på eit vis på grunn av ein del timar arbeid for å få dei til å bli det dei til slutt blei, og det gjorde nesten vondt i starten. Med tida so har det blitt bedre, men eg likar å ha moglegheiten til å ha gitarane i noken dagar før eg sender dei frå meg. Dette av den enkle grunn at då får eg anledninga til å spele litt på dei og leite litt etter ting som bør rettast på før sender dei frå meg.

Har dog ikkje vore tid til slikt kvar gong. Den strengeleiken som so langt har spelt offentlig for mest folk, sovidt eg veit i det minste, forsvann jo ut dørane få minutt etter at siste streng var sett på. Har uansett ikkje fått tilbakemelding om at noko er gale med den, so då satsar eg på at den leve og har det bra fortsatt.

Litt fordi eg sleit litt med å finne egna sigarboksar i vår, og litt fordi at det er artig å prøve andre ting, so har det blitt bygd av andre ting også utover året. Først ut var ei gammal konfektøskje , seinare har det blitt fyllt på med kakeboksar av ymse slag, brennevinsemballasje og nye sjokoladeøskjer.

I løpet av sommaren so var det jo plutselig ikkje berre kompisar, men også NRK som hadde fått med seg at eg surra på med noko litt utanom det vanlige i ei snekkarbod her på Sandane. I forbindelse med Norge Rundt innslaget, so var eg jo og ein svipp innom lokalavisa her. Med tanke på at det intervjuet blei gjennomført i søvne ein onsdagsmorgon i September, so er det kanskje like greit at det ikkje fins på nett.

Etter ein lengre periode som endå mindre frisk og rask enn vanleg utover hausten, so blei året avslutta med tre instrument eg egentlig er godt fornøgd med. Ein sekstiårspresang og to gitarar som me kanskje får sjå meir til på nyåret.

Er jo moglegheiter for at det skjer noko gøy på nyåret og, men det kjem eg tilbake til etterkvart som ting kanskje blir meir håndfaste. Det blir uansett fleire bastardinstrument utover, og det er jo litt gøy berre det. Planane om verdsherredømme er litt meir langsiktige, men ein gong skal me alle marsjere i takt til lyden av heimesnekra strengeinstrument! Eller kanskje ikkje. Eg trur strengt tatt at ikkje er det beste alternativet.

Det har uansett vore eit bra år. Eg har lært enormt mykje, og satsar på å lære endå meir framover i håp om å få til stadig bedre instrument til folk som måtte ha lyst på. So takk for i år og hjarteleg velkommen til å kike innom igjen på nyåret. Fortsatt gledelig jul og godt nyttår til de som har gidda å lese so langt ned på dette innlegget!

Ulydar på ein søndag

2010-12-19T00:28:00.000-08:00

Bittelitt lyd frå den andre som nettopp er ferdig også. Litt surt, knirkar og skranglar litt, men det er vel berre som det skal være ein søndag formiddag. Slit det med helsa.

Nedlastingslink

Å lyd med din glede

2010-12-18T17:51:00.000-08:00

Med tanke på at det snart er eit halvt år sidan sist, so er det gjerne på tide å legge ut ein liten snutt der eg spelar surt igjen. Fått litt nytt leiketøy sidan sist, so no er det boksen i naturellversjon som blir høyrt, ingen vrengt lyd gjennom boksar og dårlige kablar.

Spelinga er fortsatt ikkje allverden, men som før so er det heller ikkje poenget. Lytt og vær glade.

Nedlastingslink i bedre kvalitet

Røyking drep, musikk er gjerne sunnare?

2010-12-17T19:38:00.000-08:00

Og sidan eg har vore so fabelaktig effektiv siste veka, so kjem det gubban tute meg ein boks til med ein gong. Fantastisk!

Har, som det går an å sjå på første bildet av denne, begynt å få kloa i ymse boksar av nyare dato, so no er helseadvarslane på plass også. Hurra!

Denne gongen so blei det prøvd noko som mest sannsynleg ikkje blir prøvd fleire gonger. Romeo og Julie gav meg ein tanke om å gjere eit forsøk på eit litt hjarteforma hovud på denne gitaren. Tanken var god og gjennomføringa var ikkje like god, men grei nok. Setje strengar på spetakkelet var mindre greit nok. Funka gjorde det til slutt, men trur som sagt ikkje det blir prøvd på fleire gonger med det heilt første

Lydmessig so er denne heilt fin. Gledar meg alt til å høyre kva karen som skal ha den klarar å få utav den etter litt øving. Er nesten sikker på at me får høyre noko frå den kanten utover nyåret.

Kjem eit lite lydeksempel ein av næraste dagane, berre vent!

Meir Punch før jul

2010-12-17T19:14:00.000-08:00

Ein ny liten godklump til folket no sidan det nærmar seg jul. Ny dobbeltstrenga, ny Punch-boks og eit nytt forsøk på å gjere noke nytt og fresht med tanke på utforminga. Er jo strengt tatt berre hovudet på gitarane eg har høve til å leike meg med for tida, so då var det der det blei gjort eit forsøk denne gongen og.

Litt samsvar er jo kjekt, so eg har gjort eit forsøk på å etterlikne emblemet på boksen denne gongen. No når de veit det, so går det gjerne an å sjå på bileta.

Reint byggemessig so har eg ikkje noko spesielt å tilføre denne gongen heller. Når ting går som dei skal, so blir det lite å skrive heim om. Lydmessig derimot, so er det meir å skrive om. Som den forrige Punch-boksen det blei bygd av, so har denne og mykje lyd og bra lyd, og denne gongen kan eg love at det kjem eksempel på det.

Ein gong i løpet av dei neste par dagen so blir det lyd i stova. Kik innom igjen i næraste framtid.

Påan igjen

2010-11-25T11:17:00.000-08:00

Etter ein lang haust med ein trøblete rygg, ein senebetent arm og ymse andre distraksjonar, so er eg til slutt i gang igjen med desse strengeleikane. Først ut no er ein dobbelstrenga som forsvinn ut i verda per post i morgon. Godt å være i gong igjen, og godt å sjå at eg tydeligvis ikkje har gløymt alt i løpet av hausten.

Har egentlig ikkje so mykje å melde om sjølve bygginga. Fin boks som utgangspunkt og ting har fungert om lag som tenkt. Vellykka byggeprosjekt blir egentlig kjedelegare å skrive om, men eg føretrekk det tross alt. Heller bra resultat enn lenger avhandlingar om korleis eg redda eit prosjekt frå den sikre død.

Satsar på noko meir givande i skriftlig form seinare. No er eg strengt tatt berre glad på grunn av denne som er ferdig. Blir forhåpentligvis ikkje like lenge til neste oppdatering.

Var veldig fin klang i denne. Kanskje eg får surra meg til å ta opp litt før eg sender den frå meg.

Norge Rundt

2010-09-13T17:32:00.000-07:00

Fredag 10.09, so gjekk det eit innslag på Norge Rundt på NRK om meg og mine sigarboksar. Min umiddelbare tanke når dei var å filma tidleg i sommar, var at det var gjerne litt tidleg. Eg hadde tross alt ikkje surra med dette meir enn eit lite halvår når dei var her, men samtidig so kunne eg jo nesten ikkje takke nei til å få vise fram galskapen på riksdekkande tv.

For dei som ikkje har sett klippet, so fins klippet på NRK sitt nett-tv.

Første forsøk på dekorering

2010-08-30T11:48:00.000-07:00

Ny sigarboks og ny trestrengar. For å gjere eit lite forsøk på å få det meir interessant denne gongen, so blei mitt første spede forsøk på litt treskjæring gjort på denne. Ikkje noke å stort og ikkje noke å skrive heime om, men det må jo begynnast ein plass. Og litt artig syns eg det blei.

Om lag denne sorten sigarboks som er blitt brukt her har eg mange av for tida, so om nokon syns dei ser ok ut, so er det berre å gi eit hyl. Blir i alle høve bygd fleire med dette utgangspunktet framover.

Sjølve bygginga denne gongen var standard og problemfri, med unntak av treskjæreprosjektet. Var strengt tatt problemfritt det og, men du verden kor eg styra allikevel. Ikkje so store greiene, berre ein "krokodillekjeft" på hovudet til gitaren, men det konsentrasjonsnivået eg hadde medan eg heldt på trudde eg ikkje at eg var i stand til lenger. Var for den del anspent nok til at armane mine rista og skalv seg gjennom heile neste dag. No har eg i alle høve prøvd det, og sett at ingen dør og at eg gjerne klarar å få til noko, so då går det an å prøve seg på drøyare ting til seinare. Det har eg jo i og for seg hatt planar om lenge, men greit å starte i det små og få litt oppvarming før eg går laus på større ting.

Utanom det so er det ikkje so mykje å seie om denne. Er litt greit å ha fått kontroll nok på det eg held på med til at det som oftast går greit med alle dei vanlige delane av bygginga, og at det berre er ting utanom det vanlige som kreve litt ekstra innsats.

Lyden i denne er heilt ok. Ingenting spesielt å melde. Blir vel gjerne spelt inn noko før eg sender den frå meg.

Med voks og varmluft

2010-08-30T10:59:00.001-07:00

Ny sigarboks på gong. Trestrengar so egentlig skulle være eit rimelig standardprosjekt, men på grunn av ei mildt sagt enorm mengde med kvae i treverket, so blei jo dette litt meir styr enn eg først hadde tenkt.

Høvling og pussing av halsen var i og for seg greit nok på denne og, problema dukka først opp når halsen skulle få litt farge før første runde med olje. Eller, der og då so var jo ikkje det noko problem heller, men når det skulle pussast litt før neste runde med olje skulle på var det det blei interessant. Kjekt å oppdage at fargen knapt hang på halsen på grunn av kvaen i treverket. Ikkje ville det tørke skikkeleg heller. Kvae som ikkje har tørka sidan første halvdel av 80-talet tørkar gjerne ikkje på eit blunk no heller. Kva gjer ein so? Jaudå, min konsulent på snekkarboda visste råd, so då var det fram med ein varmluftpistol og eg gjorde eit tappert forsøk på å tørke opp det meste ved hjelp av den. Når halsen i tillegg fekk stå eit par dagar før den fekk eit lag med voks, so begynte det å hjelpe. Varmlufta og nokon ekstra tørkedøgn hjalp på det verste, og voksen forsegla den bra nok til at den no blei brukande. Er jo for den del kjekt å ha prøvd noko nytt.

Litt irriterande med fargen som verkeleg ikkje blei som eg hadde tenkt, men akkurat det er lite å gjere med no i ettertid. Er og litt interessant at denne gitaren er om lag dobbelt so tung som instrument av tilsvarande størrelse.

Var litt spent på lyden i denne, so lenge so boksen i utgangspunktet var veldig tjukkvegga. Faktisk var den so tjukkvegga at det måtte borast ut ei fordjuping gjennom halve veggen for at jack-utgongen skulle ha sjanse til å kunne monterast skikkeleg. Litt artig å ha prøvd nokon nye hjelpemiddel for å få til slikt også. Uansett, tilbake til lyden : Er "sigarboks-lyd", som vil sei stort sett bra greier. Har jo ikkje spelt so mykje på den endå, so det er litt tidleg å sei akkurat kor bra den er, men eg er positiv

So lenge so eg har ein plan om å spele inn boksen litt før eg leverar den frå meg, so er det jo ein sjanse for at eg spelar inn eitkvart og legg ut før eg leverar den frå meg. Den som leve får sjå, eller høyre.

Lille blå

2010-07-29T08:14:00.000-07:00

Ny dag, ny sigarboks. Denne er vel av dei byggeprosjekta so langt som har resultert i mest bannskap. Mykje rart som ikkje var samarbeidsvillig undervegs, blant anna første planken som var tenkt som hals, bandsaga, andre planken som var meint som hals, olja, sandpapiret og ikkje minst stålulla, men kom no i mål til slutt denne gongen og.

Er ikkje fornøgd med hovudet på denne. Litt fordi eg ikkje fekk det til som eg ville, og litt fordi olje- og stålull-tull resulterte i eit hovud som ser skittent ut. So lenge eg kanskje har lært noko av det, so få det no berre være. Resten av gitaren er eg egentlig fornøgd med. Ingenting som blei heilt krise, men skulle gjerne hatt den i hende litt lenger for å sett etter at alt fungerar som det skal.

So lenge denne blei sendt i frå meg ca 5 minutt etter at siste strengen blei sett på, so har eg ikkje fått testa den so mykje når det gjeld lyd, og eg har i alle høve ikkje rukke å spele inn noko med den. Kanskje mennesket som skal ha den spelar inn noko ein gong i framtida? Det er lov å håpe.

Her kjem jaggu ein sigarboks til

2010-07-12T10:36:00.000-07:00

Det hadde de nok ikkje rekna med tenkjer eg. Samma det egentlig. Her er den, og det er jo egentlig eit nytt standardbygg. Einaste som verkeleg var annleis med denne er at eg skulle likt å visst kva treslag den var laga av. Makan til lite samarbeidsvillige greier er sjelden eg har vore ute for. Kom uansett i mål til slutt, so eg skal vel ikkje klage, og det ferdige resultatet blei ikkje so ille.

Boksen denne gongen er litt liten, so det er ikkje mest lyd i den, men den fungerar, og når ein pluggar den i ein forsterkar so er det jo uansett ikkje nøye. Forhåpentligvis so blir han som skal ha den fornøgd, det er jo eingong det viktigaste.

Tradisjonen tru, so kjem det jo litt lyd frå denne og før eg leverar den frå meg. Likar jo å spele inn greiene litt før eg leverar dei i frå meg, i tilfelle det er noko som viser seg å ikkje å fungere.

Etter åtte?

2010-07-09T06:21:00.000-07:00

Nokon tonar frå After Eight-boksen. Etter litt om og men so blei den langt rundare i lyden enn det opprinneleg høyrdes ut som, og eg klagar ikkje av den grunn. Er jo fortsatt berre fjas som blir spelt inn, men eg klagar ikkje på det heller.

After Eighitar

2010-07-08T08:31:00.000-07:00

Etter nokon veker med mildt sagt laber framdrift, so gjer eg i dag eit grusomt comeback med det som må være eit av mine verste ordspel nokon sinne i overskrifta. Satsar på stigning utover...

Dagens ferdigstilte byggeprosjekt tok utgangspunkt i ein After Eight-boks, og som so mangt anna av det eg har bygd av, so er denne og i utgangspunktet berekna på å oppbevare ting og ikkje til å spele på. Slikt bryr eg meg uansett ikkje med og trødde til verket med iver og glød.

Gjorde eit forsøk på å få hovudet på gitaren til å likne boksen i utforminga. Heilt vellukka blei det verkeleg ikkje, men eg har lært eit par ting om korleis eg ikkje skal gjere ting til ein eventuell neste gong eg prøver på slikt. Utanom det, so er det ikkje so mykje å sei om byggeprosessen. Rimelig standard og ting gjekk om lag som eg hadde tenkt, so då har eg jo heller ikkje so mykje å klage på.

Mykje småplukk som kunne vore gjort bedre, men blei egentlig ein trivelig sak som eg jamt over er nøgd med.

Lyden i denne er, som fleire av dei andre metallboksane, litt banjoete, men samtidig ikkje so ille. Eit lite lydklipp kjem ein gong før jul.

Ikkje akkurat lyden av munnspel

2010-06-10T12:14:00.000-07:00

Då har eg fjasa litt med denne også. Har jo knapt spelt på firestrengs tidlegare, og er for den del ikkje heilt sikker på beste måten å stemme den på, men det vart no litt lyd utav det åkkesom. Slit det med helsa.

Fire strengar, andre forsøk.

2010-06-09T09:00:00.000-07:00

Tilbake i januar so gjorde eg jo eit forsøk på ein firestrengar som ikkje kan kallast vidare vellykka, so no var det etterkvart på tide å prøve igjen. Eg syns jo det er litt kjekt når folk grev og leitar litt og finn boksar som dei vil eg skal bygge om til dei, og denne var eit av dei tilfella. Ein Hohner-boks som ein gong i verda har innehelde opptil fleire munnspel har no blitt offer for litt mishandling og litt kjærlig omtanke og enda til slutt opp som ein fungerande firestrengar.

So lenge so det er ein "heilt vanleg" treboks, so er det jo ingen forskjell på å bygge utav denne i forhold til det å bygge av ein sigarboks. Einaste som var å hugse på var at det var ein streng meir enn på standardutgåvene, og det gjekk jo merkeleg nok bra i alle delar av bygginga. Av og til fungerar jo konsentrasjonsevna mi, og eg blir like positivt overraska kvar gong. For den del litt artig å ha ein heilt ny og rein boks å bygge utav. Ein del av dei tidlegare er jo gamle og har sett ut som dei har teke del i opptil fleire verdskrigar, og då gjerne på den tapande sida dei fleste gongene... Uansett, kjekt med litt nytt!

Lydmessig so tykkjer eg denne er heilt ok. Litt uvant å spele på firestrengaren, so eg er strengt tatt ikkje heilt sikker på kva den er god for, men satsar på å finne det ut før eg leverar den frå meg i Sogndal om nokon dagar.

Er mic og kjem lydklipp etterkvart. Må berre øve litt for eg leverar i frå meg tonar.

Ein ny mini

2010-06-05T11:22:00.000-07:00

Fekk i vår ein forespørsel om eg kunne bygge ein liten gitar til ei lita jente som har bursdag no til sommaren. Som sagt, som gjort. Ein langt mindre boks enn kva eg pleier å bygge av, og ein langt kortare hals enn kva eg pleier å bruke, og vips so var noko som egentlig gir meg assosiasjonar til ein ukulele på plass.

Neste spørsmål med denne er om vedkommande som skal ha den for å gi vidare er nøgd. Merkar no det. Uansett litt artig å bygge noke som er halvparten so stort som vanleg. Blei for den del litt gira på å bygge sigarboksukulele ein dag.

Usikker på om det blir spelt inn noke med denne før eg leverar den frå meg, men om det blir gjort so dukkar det no opp her etterkvart.

Trestrengs Bacardi, uten Cola

2010-05-20T11:38:00.000-07:00

Er alltid kjekt å få noko nytt å bygge utav, og denne gongen er det då ein boks som ein gong har innehelde ei litersflaske med Bacardi. Denne gongen blei det tenkt og tegna mykje på forhånd. For den del blei det ein del prøveskjæring i papp før eg gjekk laus på botnen av boksen.Det å skjære til eit passlig hol i botnen, slik at halsen kunne gå gjennom og at den samtidig skulle gå i lås, var eit puslearbeid, men det gjekk jo overraskande bra.

Jamt over so var eg heldig med det meste med bygginga av denne. Fargen på halsen enda opp med å matche kroppen, halsen passa merkeleg bra i kroppen, hovudet fekk ein ok fasong og alt gjekk unormalt greit. Eg klagar uansett ikkje når det er den vegen det går.

Alt i alt veldig fornøydd med denne. Lyden overraska jo og positivt. Litt "banjoete" i klangen denne og, men med ein fyldigare og rundare klang enn eit par av dei andre metallboksane.

Pga at eg blei ferdig med denne i dag, og leverte den til den nye eigaren i dag, so fekk eg ikkje testa elektronikken i den, men skal sjå om eg litt på sikt får overtalt han som no har den til å spele inn litt som eg kan få lov til å legge ut her.

Det blei jo lyd i dag og gitt.

2010-05-19T08:19:00.001-07:00

Ingen stor kunstnerisk oppleving med tanke på spelinga i dag heller, men det er no so. Ein dag skal eg spele inn noke litt meir skikkeleg til folket! Fram til då so får de slite med mine fort og gale og eitkvart gjort på sparket og som høyres ut slik som det gjer. Det vart no lyd i dag og.

Alle gode ting er tre

2010-05-18T07:41:00.001-07:00

Og av den grunn blei det bygd ein ny gitar av ein sigarboks av tre, med ein hals av tre og med strengar tre. Nokon vil sikkert hevde at det er ein treskalle som bygger dei og, men den diskusjonen kan me ta ein anna gong.

Vil uansett bruke litt tid til å hylle treverket denne gongen. Eg let meg stadig fascinere over lukta av treet når eg sitt og jobbar. Ein ting er gode gamle furua som stadig er i bruk som halsar på greiene, men eg er spesielt fascinert over sigarboksane. Eg anar jo ikkje kva treslag det er i noken av dei, men ein del av dei luktar enormt spennande. Denne i dag lukta eit eller anna som eg ikkje klarar å plassere, men det gir meg assosiasjonar til krydder og varmare klima. Ein av dei tidlegare boksane lukta jo klart og tydeleg kanel. Syns som sagt det er spennande, og gledar meg kvar einaste gong eg skal sage hol i boksane for å sjå kva det luktar denne gongen. Eg blir neppe ein mann som stirrar på geiter nokon gong, men eg veit ikkje om det er so mykje bedre å lukte på tre.

No tilbake til dagens ferdigstilte. Kom litt skeivt ut med den, med tanke på at halsen, som følge av eit uhell, blei tynnare enn kva eg hadde tenkt meg, men samtidig so ville eg prøve og sjå om den heldt. Det gjorde den, men denne er på grensa for kva som går bra. Uansett greit å vite til seinare.

Var og ein del ufin klirring i den, men etter ein halvtimes tid med tenking, pussing, filing og rikelege mengder mumlande bannskap, so blei feilen funnen og utbetra og no skal alt fungere fint.

Litt annleis klang i denne enn dei andre på grunn av eit lok som var dobbelt so tjukt som vanleg. Tonen ligg liksom ein anna plass enn vanleg i boksen. Forklare på noko vetig vis får eg ikkje til, men er som sagt litt annleis. Er uansett fin lyd i den, og den kling veldig på ein del av dei lysare tonane.

Skal få spelt inn litt lyd med denne og før eg sender den frå meg, men det skjer ikkje i dag.

There will be sound, again!

2010-05-13T20:01:00.000-07:00

Av og til let eg meg nesten imponere over kva som går an å få til med ein gammal sigarboks, ein hals laga av ein furuplanke frå ei seng og eit mic-oppsett til rundt femtilappen. Ikkje at eg imponerar spelemessig i dag heller, men eg likte lyden av denne, og det er no eingong det viktigaste. Ikkje eg som skal spele på den i framtida uansett.

Ein Hofnar(r) tilbake i underhaldningas teneste

2010-05-12T08:47:00.000-07:00

Ny sigarboks på gong. Denne gongen var det ein Hofnar som har fått eit nytt liv som gjerne er litt annleis enn den såg for seg då den eingong var full av sigarar. Standardprosedyre på bygginga denne gongen også, med tre strengar og piezomic.

Einaste skikkelege forsøket på noke litt nytt og annleis denne gongen, er at fargen på stemmeskruene skal matche fargen på hovudplagget til narren på boksen. Grønt på eine sida og raudt på andre, om lag som båtane. Blei og gjort eit forsøk på å pusse ned kantane på hovud og endestykket på halsen for å matche dei skrå kantane på boksen, men dette blei ikkje 100% vellukka. Uansett nær nok til at det får gå for denne gongen. Eit par hjørne ser bra ut i det minste.

Denne boksen blir forøvrig solgt i lag med eit par speletimar via skype. Kan bli interessant å sjå korleis det vil arte seg, men satsar på at det går bra so lenge so boksen skal i aktiv teneste om den nye eigaren lærer seg å bruke den.

Har ikkje testa elektronikken endå, men reknar med at den funkar denne gongen og, so då skal det komme eit lite lydklipp ein av dei næraste dagane.

Blått på grønt?

2010-05-02T08:17:00.000-07:00

Burde jo bli det med noke lyseblå tonar på ein grøn boks. Lyden er halve opplevelsen påstår noken, so her kjem den :

Det er vår, og det blir grønt overalt

2010-04-27T08:43:00.000-07:00

Til og med kakeboksane er grøne om våren. Om grønfargen er fin kan sjølvsagt diskuterast, men den var no eingong slik som dette. Er litt variasjonar over tema hals og hovud på denne. Fyrste gong eg prøver å vinkle hovudet litt og ha alle stemmeskruene på same sida. Vellukka? Kanskje. Blir prøvd minst ein gong til, for å bruke opp dei tre stemmeskruene som er igjen i dette settet. Er jo uansett alltid artig å prøve på noke nytt. Litt meir fjas med pussing og ordning på hovudet, og resultatet blei jo til å leve med.

Uvisst av kva grunn, so enda jo denne og opp med eit snev av banjoklang. Kvifor nokon kakeboksar får det, medan andre ikkje er i nærheita, har eg verkeleg ikkje noko svar på per i dag. Ser kanskje eit mønster i det etterkvart, men foreløpig so har eg verkeleg ikkje peilingen. Er jo noko å forske på for framtida. Eg har lyst til å vite.

Må jo og nemnast at det er den fyrste metallboksen eg har bygd av som heng i hop ved eiga hjelp etter at eg var ferdig med den. Eg trur det er eit godt tegn. Uansett greit å spare gaffatape og superlim til andre formål.

Er mic i denne, so det kjem litt lyd etterkvart.

Sigarboks, no også for venstrehendte

2010-04-13T11:16:00.000-07:00

Her kjem den korte historia om mitt første forsøk på ein venstrehendt gitar. Når folk som er venstrehendt har lyst til å klimpre på ein sigarboks, so ordnar eg jo det. Er jo egentlig ikkje so mykje nytt å melde, anna enn at denne er andre vegen enn kva eg har gjort tidlegare. Måle, sage, banke, skjære, styre, ordne, høvle, pusse og bore, og plutselig var ting begynt å ta form.

Som nokon kanskje legg merke til, so er eg begynt å tenke bittelitt meir samanheng i det eg held på meg. Litt vinklar og figurar som kan finnast igjen, eller i det minste har prøvd å kunne la folk få finne igjen, fleire plassar, og litt slikt. Dette er jo ein Cohiba-boks, til liks med den første eg bygde på seinhausten i fjor, og det var himla artig å sjå dei to ved sidan av kvarandre i dag. Eg har blitt ørlite flinkare til ein del ting, og meir forseggjort med finishen på det. Skulle nesten teke bilde av dei to i lag og lagt ut. Kanskje ein plan for morgondagen.

Av ting eg lærte når eg bygde denne, so MÅ det nemnast at eg må være meir effektiv om eg skal gi halsen ein runde beis før oljinga. Her var det blitt alt for mykje farge. Eit strøk og fort og gale skal være oppskriften. Eg var litt meir nøye, som med olja. Jaja. Ingen som dør uansett, håpar eg i det minste. Eller, er jo alltid noken som dør, men forhåpentligvis ikkje som følge av dette.

Til slutt so må eg sei at sidan denne er venstrehendt, so blir det ikkje lagt ut noke lytteeksempel frå mi si side. Spelar fælt nok "rett" veg, og treng ikkje utfordre skjebna. Får tru han som skal ha den blir flink, so kan det kanskje komme noken tonar litt på sikt. Me ser!

Meir kakeboksing

2010-03-23T13:40:00.000-07:00

Med tanke på at eg etterkvart har begynt å få taket på det grunnleggande i bygginga, so er eg no begynt å legge endå meir arbeid i finishen på det eg surrar med. Ein ting er at det blir lyd, og at eg i bunn og grunn er glad for det, men er jo litt stas om ting ser litt ok ut også. Det som er fint der, er at det alltid er meir å strekke seg etter. Det perfekte fins jo ikkje, og so lenge utgangspunkta er litt forskjellige, so blir jo det ferdige resultatet aldri likt.

Er fortsatt kakeboks det går i. Ein ny rund sak, slik som den forrige, men det viser jo at eg lærte mykje av den. Dei feila som blei begått då er stort sett styrt unna denne gongen. Støare på handa med ymse skjærereiskapar er eg jo og begynt å bli. Skal sjå at eg driv å lære ting, og det er jo nesten skummelt.

Største forskjellen på denne i forhold til den forrige er uansett at halsen har fått eit par rundar med olje, og at det til ei forandring blei lagt noken planar i litt bedre tid, so det faktisk gjekk an å utføre dei. Nytt opplegg for å feste strengane vart det også denne gongen. Eg syns det ser bra ut, men hadde jo blitt endå bedre om eg ikkje måtte styre og ordne ein del med det etter oljinga for å få alt til å henge saman på ein tilfredsstillande måte. Eit par små riper og litt limsøl skjemmer jo litt, men ikkje verre enn at det går bra. No har eg jo uansett prøvd det, og veit kva som må gjerast for å få det til å fungere som opprinneleg tenkt, og det vil jo sei at neste forsøk blir meir vellukka. Garantiar fins jo sjølvsagt aldri, men det er lov å håpe i det minste.

Oljinga av halsen er uansett noke som må gjentakast. Du verden for ein forskjell det vart på det ferdige instrumentet. Er meir arbeid og tek meir tid, men med tanke på resultatet, so syns eg det var verdt det. Neste spørsmål er om dei som skal ha framtidige byggverk syns det er verdt det, men det får no bli teke opp til debatt når den tid kjem.

Er forresten ein interessant "banjoklang" i den her. Gudane må vite kvifor det blei det, eg veit uansett ikkje. Litt gøy er det i alle høve! Gjorde eit par forsøk på å filme litt i dag, so får eg myse på det etterkvart og sjå om noke av det blir lagt ut ein av dagane.

Lyden av julekaker

2010-03-09T06:14:00.000-08:00

Sjølv om jula varer heil til påske, so er det uansett snart slutt på den i denne omgang, og kva passar då bedre enn å spele litt på kakeboksane som no gjerne er tomme.

Mitt bidrag til ikkje akkurat julemusikk som er framført på julerekvisitt kan lyttast til her. Bommar sjølvsagt stygt på noken tonar på slutten, men gadd ikkje prøve fleire gonger her og no. Er uansett lyden, og ikkje om eg spelar rett, som er det viktigaste.

Kaffi og kaker?

2010-03-09T05:22:00.000-08:00

Medan eg går og ventar på påfyll med sigarboksar frå ymse verdshjørne, so må eg jo allikevel drive med eitkvart. I dag ; kakeboks. Ein rimelig stor kakeboks burde jo resultere i mykje lyd tenkte eg på forhånd, og i dette høvet fekk eg rett.

På grunn av størrelsen på boksen, so tenkte eg at no var eit bra høve til å prøve ein ny dobbelstrengar, so då var det fram med større planke og til å gjere seg klar til å lage spalter og styre på igjen. Prosjektet med å feste halsen til boksen var derimot verre. Utan min vegledar på plass i snekkarboda, so var det dags for lett improvisasjon. Sage boga spor er jo ikkje noke eg driv med til vanleg, so her var det fram med kniv og pågangsmot og surre på ein times tid til det til slutt passa saman på eit vis. Med god tid, samt ein anstendig mengde bannskap og bønn, so er det mykje rart som går seg til.

Litt nedtur at boksen ikkje heng skikkeleg i hop av seg sjølv etter eg var ferdig med den, so eg måtte gi den ein omgang gaffa-tape til slutt, men det får no berre være. Kunne sjølvsagt limt den i hop med min trufaste venn, superlimen, men er jo greit å ikkje forsegle boksen for evig og alltid.

Lyden er uansett god i denne også. Mykje lyd blei det også, so då må jo alle være fornøgde. Har sett i mic, so det kjem eit lite lydglimt frå den om ikkje so lenge.

Elektrisk sjokoladeboks

2010-03-04T13:52:00.001-08:00

På lista over spørsmål menneskeheita gjerne ikkje stiller seg so ofte, so trur eg : "Korleis høyres ein gammal engelsk sjokoladeboks ut om ein sett på hals, strengar og dyttar i ein mikrofon?", kjem til å være eit stykke opp på lista. For dei som måtte lure, so har eg no gjort eit forsøk på å besvare det.
Meir metallisk og meir romklang enn sigarboksane, men ganske trivelig uansett.

Trykk play og nyt.

Mykje lyd og lite varme...

2010-03-03T13:56:00.001-08:00

Tru og håp det kan du få med, men eg gir ingen garantiar. Uansett er det dags i her i vinterkulda å legge ut eit lite lydklipp til. Fort, gale, lite triksing og ingen miksing, men uanlell. Lyd it is! Ein bittelitt overfølsom mikrofon i denne boksen, men det går seg vel gjerne til. Er litt spent på tilbakemelding frå mennesket som skal ha denne, det skal eg ærleg innrømme. Åkkesom, les og lytt og vær glade, i løpet av det neste halve året er nok våren på plass!

Sjokoladens akkustiske eigenskapar.....

2010-03-02T12:16:00.000-08:00

Eg har jo sagt at det skal gjerast forsøk på andre ting enn sigarboksar, og sidan det no om dagen er tomt for sigarboksar i heimen, so var det dags for å setje dette ut i livet. Dagens offer var ein gammal engelsk sjokoladeboks. Bilde av dronninga og gubben og berre velstand.

Måtte jo angripe den her litt annleis enn kva som er opplegget med sigarboksane. Ikkje alt av knivar og sager so bit like godt i ein blekkboks som dei gjer i tre. Rart det der. Åkkesom so gjekk det no an å lage plass til halsen i boksen, og sage noken spor i halsen som lokket til boksen passa i for å låse hals og boks litt saman. Er jo ein fordel om ting heng i hop og ikkje ramlar frå kvarandre heilt utan vidare.

Bortsett frå det, so var no bygginga litt som alltid. Litt middagsrestar og litt sengeplankar og litt stemmeskruer og strengar, og vips so er det blitt lyd. Lyden i denne er forresten alt anna enn eg forestilte meg. MÅ få dokumentert den på litt skikkeleg vis, so eg er litt usikker på korleis eg skal fikse det, men det kjem eitkvart ein gong. Eg høyrde uansett for meg noke litt skarpt og gjerne litt ala ein banjo i klangen, men dengang ei. Derimot kan dei britiske kongelige varte opp med ein noget sær romklang. Egentlig usikker på korleis eg skal beskrive det, men det skal som sagt komme eit prøvelytt på det ein gong i framtida.

Slutt på OL og tilbake til bygginga.

2010-03-02T10:59:00.000-08:00

Etter ein OL-pause er livet i snekkarboden i gang igjen. Dagen i dag resulterte blant anna i ferdiggjering av ei ny salsvare. Standard trestrengar med piezo-mic som skal avgårde til ein kompis med tid og stunder.

Opptil fleire eksempel på at eg ikkje har hatt tankane med meg når eg bygde denne, men det gjekk no bra til slutt. Lurer fortsatt på kor eg var hen når det skulle lagast plass til halsen i sigarboksen. Sentrert er den jo ikkje, men so lenge rekne-/teljefeilen blei gjort til same veg på begge sider er det jo ikkje nøye so nøye. So halsen står med andre ord litt for langt oppe på boksen i forhold til det eg hadde tenkt. Hadde eg helde kjeft om dette i staden for å skrive det her, so er det vel ingen som hadde brydd seg.

Sidan dette er første snekreriet som skal avgårde til nokon som faktisk spelar gitar slik til vanleg, so er eg jo litt spent på responsen. Den tid, den sorg. Eller glede, alt etter som. Viktigaste er at det er lyd og at alt virkar som det skal.

Er forresten eit bilde av piezo-micen nedi her so folk og dyr og andre eventuelle interesserte kan kikke på.

Kjem ein liten lydsnutt med denne i løpet av morgondagen. Eller ein av dei neste dagane. Merkar no det. Før helga i alle fall.

Lyd?

2010-02-14T05:05:00.000-08:00

Forhåpentligvis har eg no fått til at det er blitt litt lyd ut til folket. Om ting funkar som dei skal, so skal det no være råd å høyre mitt første forsøk på sigarboks med elektronikk. Plugga rett frå forsterkar og i mic-inngang på pc'en, og ikkje gjort noke meir med etterpå, men eg er uansett positivt overraska.

Ein nedlastingslink for dei som syns det er kjekt.

Elektronikk? Ja takk

2010-02-12T07:17:00.000-08:00

Har jo ei stund hatt ein plan om å få på plass elektronikk i noken av boksane, og no har eg til slutt fått ut fingen og fått gjort noke med det. Ein billig mono-jackutgang, eit piezo-element, litt kabel, litt teip og bittelitt arbeid med loddebolten var det som skulle til. Smått sjokkert sidan det fungerte som det skulle på første forsøk. Pleier ikkje å være slik når det er eg som trør til verket med iver og glød.

I min iver so gløymde jo eg sjølvsagt å ta bilde av spetakkelet, men det blir jo laga fleire seinare so bilda kjem. Lydeksempel like så, har spelt inn litt alt og skal få det på plass her med tid og stunder. Posten her er egentlig berre fjas, men "måtte" jo berre få på trykk det at ting faktisk fungerar etter planen.

Endeleg noko klart til levering

2010-01-28T14:04:00.000-08:00

Etter nokon sjukedagar i vinternorge var eg i dag tilbake i snekkarboda og fekk fullført ein gitar som har vore påbegynt ei stund. Denne blir den første eg leverar frå meg, og er jo selvfølgelig spent på responsen frå han som skal bli den stolte eigar. Denne gongen var det ein filipinsk sigarboks som var basis. Gudane må vite kva treverk som er i den, for den var ei smule vanskeleg å jobbe med, men resultatet blei jo godkjent til slutt denne gongen og. Var jo spent på kva lyd som kom til å bli i den, sidan treverket var annleis enn kva eg har vore borti tidlegare, men det funka fint denne gongen og.

Blei lagt ned ein solid pussejobb på halsen denne gongen. Ein skjemmande kvist på baksida "måtte" vekk, og når sandpapiret fyrst var framme, so kunne eg jo ikkje gi meg før heile greia såg nokonlunde ok ut. Arbeidsmessig so fristar det ikkje å gjenta den jobben seinare, men resultatmessig so er det noko eg absolutt bør gjere, so då blir det vel slik...

Bortsett i frå det so er det vel ikkje so mykje å sei om denne. Standard prosedyre for ein trestrengar. Det artigaste er jo egentlig å høyre korleis resultatet blir når den er ferdig. Når/om den dagen kjem at eg kan bedømme skikkeleg korleis klangen i eit instrument blir berre ved å dunke litt på kassen før eg begynnar, so veit eg ikkje om eg gidd meir. Då er jo halve moroa bortevekk.

Dukka forøvrig opp eit par nye idear under arbeidet med denne, som gjerne blir prøvd seinare ein gong, men det kjem eg tilbake til når so lang lir.

Satsar på å få lempa ut eit lite lydklipp av denne og før eg leverar den i frå meg, men det blir ikkje gjort noko med i kveld, so mykje kan eg love.

Den fyrste fiasko eg snekra saman....

2010-01-21T12:38:00.000-08:00

Det fyrste fiaskoprosjektet so longt har sett dagens lys... Skulle bli, og blei for den del, ein firestrengar som ein kompis av meg skulle ha, men mitt forsøk på å lage ein tynn og lettspelt hals enda opp med å bli ein altfor mjuk hals som berre bøydde seg noke verre. Forsøket med å skru fast litt metall og ekstra tre på baksida av halsen hjalp ikkje nok det heller, so denne blei liksom ikkje det eg hadde tenkt. Kan selvfølgelig lage ein ny hals til den, og det blir vel gjerne gjort på sikt, men foreløpig får den berre ta plass i "Hall of Shame" og stå der til skrekk og advarsel. I det minste so har eg no lært korleis eg ikkje skal gjere ting neste gong...

Uansett litt synd at den ikkje fungerar som eg hadde tenkt, for lyden er rimelig fin i den. Halsen er uansett so bøyelig at om eg flyttar bittelitt på gitaren, eller legg bittelitt vekt på kroppen, medan eg spelar, so forsvinn alt som kan minne om ein gitar som er stemt. Bedre lykke neste gong.

Eit knøtt til knøttet

2010-01-15T12:11:00.000-08:00

Mest for moroskuld, so blei det snekra saman ein liten tostrengar denne veka. Skal sendast avgårde som gåve til ungen til ein kompis. Mykje same prosedyre som dei forrige med tanke på tilpassinga av halsen, men planken var egentlig for tynn for stemmeskruene, so der måtte det improviserast litt. Lim og pussemaskin ordnar uansett det meste. Sjå fjerde bildet for å kanskje skjønne kva eg snakkar om. Strengefestet blei for den del ei ny løysing denne gongen og. Fjerde gitaren og fjerde måten å gjere det på. Det er jo uansett det som er litt gøy. Når eg ein gong endar opp med to instrument som er meir eller mindre like, so forsvinn jo litt av sjarmen. Blei jo litt meir lyd i knøttet enn eg først hadde tenkt, og det er jo ikkje negativt, so eg er nøgd i dag og.

Skal sjå om eg får surra meg til å filme litt av denne og før eg sender den frå meg, men det skjer ikkje i dag.

Lydeksempel med første gitaren

2010-01-14T14:01:00.000-08:00

Og eit lite klipp med den førstefødde. Ein gong skal eg bli flinkare å spele og flinkare å få filma, men inntil den dagen kjem, so får folk og dyr og eventuelle andre berre slite med den kvaliteten det blir på det her.

Litt meir video

2010-01-14T13:45:00.000-08:00

Ny gitar, meir lyd, kan fortsatt ikkje spele noko særleg, filme med mobil er fortsatt bajs og livet er herlig dere! Denne kan bli heilt glimrande å spele på berre eg blir vant med den, men foreløpig er det jo berre fjas og so må eg syte endå litt meir pga lydkvaliteten i mobilen. Uanlell so er det no plutselig lagt ut ein video til. Slit den med helsa!

Feil stemmeskruer = Dritfeit gitar

2010-01-14T12:50:00.000-08:00

Kva gjer ein når dei stemmeskruene som kjem i posten ikkje er av det slaget eg egentlig hadde tenkt å bestille? Eg for min del gjorde ei ny bestilling og fekk rette slaget to dagar etterpå, og la i mellomtida ein plan for dei andre. Dei to gitarane som har vore bygd før denne har jo vore trestrengs. Med tre og tre stemmeskruer som heng i hop, so var det litt tyle med ein ny trestrengar, men ein "tolvstrengar" med seks strengar derimot! Det var ein god plan!

Ein del meir arbeid med denne på grunn av det. Måtte jo lage til spalter i hovudet på gitaren, samt bedrive litt nøyaktig boring for å få stemmeskruene til å passe. Bortsett frå det, so var det standardprosedyre for å passe til halsen i boksen, men litt meir arbeid med stol og sadel so lenge det var fleire strengar inni bildet. Måtte for den del improvisere litt når det blei laga feste for strengane på nedsida av boksen, men det funka som juling! Er dessuten bora hol og sett i ein jack-utgang, men foreløpig lite anna. Kjem tilbake til elektronikken seinare.

Må jo og legge til at eg var forferdeleg skeptisk når eg dreiv å sette strengar på denne. Var forberedt på at byggverket skulle kollapse med eit stygt smell, men det heldt.

Sjølv om det er "tusen" ting som skulle vore gjort annleis eller bedre med denne gitaren og, so er eg uansett veldig fornøydd og har fått ein del nye idear som skal setjast ut i livet under seinare byggingar.

Vegard spelar ting han ikkje kan

2010-01-13T11:04:00.000-08:00

Etter oppfordingar frå minst to menneske, so blir det ein liten video i dag. Jobbar fortsatt med å lære meg å spele på greiene, og gitaren her er ein dag gammal i skrivande stund, so eg er ikkje kjent med halsen på den, men de får no uansett eit visst inntrykk av korleis lyden er i den. Dessuten er vel Sony Ericsson meir kjent for å lage mobilar enn kamera, men inntil vidare so får dette duge. God fornøyelse!

Er sikkert ein eller anna melodi som høyres ut om lag som det eg spelar, men frå mi si side so er det no egentlig berre litt fjasing som foregår. Uansett so var det første videoen her på bloggen, og første eksempel på korleis gitarane kan høyras ut.

"Konsulentjobben"

2010-01-12T12:02:00.000-08:00

Gitar nummer to som blei ferdig er jo strengt tatt ikkje mitt byggeprosjekt, men so lenge den blei til ca 2 meter unna meg og eg fungerte som "konsulent", so blir den nemnt her, og litt bilde av prosjektet må ut til folket. Gitaren denne gongen var den som han eg bygge lag med måtte få til eige bruk. Må jo ha noke håndfast å vise fram, samt å klimpre litt på, han og.

Fortsatt er det sigarboksen som er basisen, men med noken modifikasjonar frå den forrige. Litt hjortebein og metall gjer at gitaren ser bedre ut denne gongen. Det er jo uansett litt av tanken, å sjå kva som kan gjerast annleis og prøve litt nye løysingar. I alle høve so blei ein ny trestrengar ferdig i dag, og den låt endå bedre enn den forrige. Håpar på å få ut ein video av denne etterkvart.

Alt i alt eit fint instrument denne gongen og.

Den fyrste gitar eg bygga fekk

2010-01-11T21:43:00.000-08:00

Sjølv om det ikkje blei teke bilde under bygginga, so må eg jo poste eit bilde eller tolv av det ferdige produktet. Til denne, so er kroppen ein sigarboks av merket Cohiba og halsen er ein furuplanke. Spe på med noken stemmeskruer, eit par strengar og eit par skruer for å få festa strengane, og resultatet blei dette.

Sett i ettertid, so er det mykje som skulle vore gjort på anna vis, men samtidig so blei jo denne som den blei og då skal det ikkje rettast på noko seinare. Er derimot greit å ha noko håndfast, slik at det er lettare å sjå kva som kan eller bør rettast på til seinare prosjekt. Blei i alle høve eit strengeinstrument utav det, og det blei egentlig overraskande bra lyd i den. Er dessuten utruleg artig å spele på. Det å få noko nytt i hendene gav meg meir speleglede enn eg har hatt på lenge, so alt i alt er eg veldig nøgd

Litt bakgrunn

2010-01-11T12:17:00.000-08:00

For ei tid tilbake, so snubla eg over eit youtube-klipp av ein kar som spelte på ein trestrengs sigarboksgitar. Eg, som den evig nysgjerrige på det meste som har med musikk å gjere, måtte jo sjekke ut litt meir om det her og fann fleire videoar. Etterkvart dukka det og opp eit par sider på nettet med meir info om sigarboksgitaren, og ikkje minst arbeidstegningar for korleis ein kan bygge ein sjølv. Dette måtte jo prøvast, og jakta på sigarboksen var i gang.

Etter at den kom i hus, so var det å hanke inn resten av nødvendigheitene for å få det til å bli eit instrument som stod på programmet. Og undervegs i den prosessen var det at den største hjelpa i arbeidet kom på plass. Å få låne seg ei snekkarbod, til og med utstyrt med håndverkaren som bidreg der mine ferdigheiter på byggefronten seier stopp, er eit fantastisk utgangspunkt for å lage noko.

Tenkte ikkje på å ta bilde under byggeprosessen på den fyrste sidan det egentlig ikkje var meininga at det skulle bli fleire, men sidan det var himla artig å prøve seg på, og ikkje minst spennande å tenke på kva meir som går an å få til, so blir det jo fleire forsøk på strengeinstrument framover. Dei som no er undervegs, under planlegging eller påtenkt berre det melder seg meir byggemateriale, blir bedre dokumentert under bygginga.

Er jo for den del det som er grunnen til denne bloggen. Greit for min del å dokumentere det eg held på med, og muligens det er nokon der ute som syns det er litt kult å lese om eller sjå bilde av ymse byggverk. Har og planar om å fylle på med litt videoar berre eg blir litt flinkare å spele på greiene, samt at eg treng noko litt bedre enn mobilen å filme med. Tek det på sikt. No er eg uansett i gang med bygginga og blogginga, og so får det berre bli som det blir utover.